U shkarkua se ngriti flamurin shqiptar, ish-kryekomunari i Preshevës: Ndodhi në mes të natës, pas kërcënimit të Vuçiç!

Shqiprim Arifi, ish-kryetari i Luginës së Preshevës i cili u shkarkua së fundmi nga posti i tij, në një lidhje skype për “Breaking” me gazetaren Fiori Dardha në Top News ka shpjeguar të pathënat që fshihen pas kësaj lëvizje të presidentit serb Aleksandër Vuçiç.

Arifi tha se u shkarkua pasi kishte valëvitur në flamurin shqiptar në ballkonin e komunës që drejtonte në jug të Serbisë si dhe për kritikat e vazhdueshme që bënte ndaj politikave serbe. Ai tregoi sesi fillimisht ishte gjobitur nga gjykata dhe fill pas kësaj, i kishte ardhur lajmi i shkarkimit nga posti.

“Përveç veprimeve që kam bërë me flamurin kombëtar kam qenë edhe kritik ndaj politikave të Serbisë në Preshevë dhe në rajon në përgjithësi. Në fillim të javës presidenti Vuçiç vetëm kërcënoi publikisht sidomos shqiptarët e Luginës së Preshevës dhe pas 3 ditëve më erdhi gjoba nga gjykata Serbse se do dënohem për vendosjen e flamurit kombëtar dhe pas gjobës më erdhi shkarkimi në mes të natës. Pra në orën 11:00 të natës së të premtes”– tha Arifi.

Ndër të tjera, ish-kreu i Luginës së Preshevës ngriti pretendime se mund të ketë pasur një koordinim mes Vuçiç dhe Kurtit për shkarkimin e tij pasi drejtimin e komunës e kanë marrë në dorë zyrtarë shqiptarë pranë Vetëvendosjes.

“Unë kurrë nuk kam qenë as i njërit as i tjetrit por i popullit këtu në Preshevë. Shkarkimi im nuk ka mundur të rezlizohet nëse do të kishte pasur shqiptarë të Luginës së Preshevës që më zevendësojnë tani deri në zgjedhjet e radhës më 2 qershor. Këta shqiptarë të Preshevës që kanë marrë drejtimin Teknik deri në zgjedhjet e ardhshme, janë njerëz të Kurtit.

Mua Serbia dhe Vuçiç më ka shkarkuar me traditën e Millosheviçit. Por kësaj kohe ka dashur të jetë një parakusht, koordinim me Vetëvendosjen e Kurtit. Njerëzit që kanë hyrë në udhëheqjen teknike deri në zgjedhjet e ardhshme, e kanë marrë aprovimin e Kurtit”- shtoi ish-kryekomunari.

Arifi theksoi ndër të tjera se kryeministri i Kosovës, Albin Kurti nuk ka bërë asnjë reagim mbi shkarkimin e tij.

“Nuk kam parë reagime publike por kam pasur mesazhe të shumta nga kolegët. E kam bërë të ditur se Kurti nuk ka për të reaguar fare për shkarkimin tim. Edhe Kurti edhe Vuçiç kanë hequr një zë kritik në Luginën e Preshevës”– shtoi Arifi.

Back to top button