Edmond Budina: Rama-Veliaj nuk ikin vetë, t’i tërheqim zvarrë. Nuk rrëzohen me fjalime këta

Regjisori Edmond Budina i ka shkuar poshtë ballkonit Sali Berishës dhe ka mbajtur një fjalim. Ai tha se nuk është kundër drejtësisë, por kur drejtësia bën padrejtësi, “atëherë ne nuk mund të rrimë pa reaguar”.

Duke e cilësuar arrestin për Berishën si të burgosur politik, Budina tha se duhet reagim i fortë.

“Si mendoni ju se Edi Rama apo Erion Veliaj do të dorëhiqen? Jo ore jo, ne duhet ti shkulim ata, madje edhe ti marrim zvarrë po të jetë e nevojshme.

Nesër (sot) është dita e sulmit kundër hajdutëve, kundër atyre që mbështesin këtë mafia që është instaluar në Shqipëri.

Ne nuk dalim në shesh për Sali Berishën, por dalim për të drejtat tona që na i vjedhin, që na masakrojnë”, tha Budina.

Ai tha se SPAK fle, mbron mafiozët Edi Rama dhe Erion Veliaj, “ndaj edhe ne jemi kundër tyre, kundër këtij sistemi drejtësie”.

“Edhe mosbindja civile nuk është thjesht të dalim ne këtu, të kryejmë veprime konkrete. Të organizojmë revolt, ku të gjithë tregëtarët të ulin qepenat, të bllokojmë rrugët me makina. Me fjalime këta nuk rrëzohen”, tha Budina.